એક તમારા મત ને ખાતર ખોટો ના ચૂંટાય તે જો જો .
એક તમારા મતને ખાતર સાચો ના રહી જાય તે જો જો .
એક તમારા મતમાં અસલી જતુંનાશક દવા ભરી છે
ઝીણા ઝેરી જંતુઓથી સંસદ ના ઉભરાય તે જો જો .
એક તમારા મૂંગા મતને કારણ મહાભારત સર્જાયું
મહાન આ ભારતનો પાછો ચહેરો ના ખરડાય તે જો જો .
એક તમાર મતની કિંમત નથી જાણતા તો જાણી લ્યો ,
સોનાની વસ્તુ છે એ લોઢામાં ના ખર્ચાય તે જો જો .
એક તમારા મતથી ખાટું મોળું શું થાશે જાણો છો ?
એક ટીંપાથી આખ્ખે આખ્ખું દૂધ ન ફાટી જાય તે જો જો .
એક તમારા મતથી ધાર્યું નિશાન વીંધી નાંખો છો પણ ,
એજ તમારી ઓળખનો અંગુઠો ના છીનવાય તે જો જો .
એક તમારો મત મેળવવા કહેશે તારા તોડી લાવું ?
રાહ જુઓ પણ ધોળે દાડે તારા ના દેખાય તે જો જો .
એક તમારા મતની પળને સમજીને સાચવજો અથવા
પાંચ વરસ માટે છાતીમાં ડૂમો ના અટવાય તે જો જો .
h.mangukiya
