કમાલ કરે છે
કમાલ કરે છે...
એક ડોસી ડોસાને હજી વહાલ કરે છે...
ડોસો જાગે ત્યારે ચશ્માં આપે
અને બ્રશ ઉપર પેસ્ટને લગાડે,
લોકોનું કહેવું છે ડોશી તો આમ કરી
ડોસાને શાને બગાડે ?
મસાલા ચા અને ગરમાગરમ નાસ્તો
ડોસી ડોસાનો કેવો ખ્યાલ કરે છે.
નિયમ પ્રમાણે દવા આપે છે રોજ
અને રાખે છે ઝીણું ઝીણું ધ્યાન,
બન્નેનો સંબંધ તો એવો રહ્યો છે
જાણે તલવાર અને મ્યાન,
દરમિયાનમાં બન્ને જણ મૂગાં મૂગાં
એકમેકને એવાં તો ન્યાલ કરે છે.
કાનમાં આપે છે એવા ઈન્જેકશન
કે સિગારેટ, શરાબ હવે છોડો,
ડોસો તો પોતાની તાનમાં જીવે
ક્યારેક વહેલો આવે કે ક્યારેક મોડો,
બન્નેની વચ્ચે વહે આછું સંગીત
પણ બહારથી તો ધાંધલધમાલ કરે છે.
ડોસો વાંચે અને ડોસીને મોતિયો,
બન્ને જણ વચ્ચે આવો છે પ્રેમ,
લડે છે, ઝઘડે છે, હસે છે, રડે છે,
જીવન તો જળની જેમ વહેતું જાય એમ,
દોસ્ત જેવી દીકરીની હાજરીમાં બન્ને જણ
ઘરની દીવાલને ગુલાલ કરે છે.
Sent from my h.mangukiya
